நாம் சிரிக்கும் நாளே திருநாள்

வணக்கம் நண்பர்களே...
 எனது அன்பிற்குரிய சகோதரர் திரு. ரூபன் அவர்கள் நடத்தும் தீபாவளியை முன்னிட்டு நடத்தும் கவிதைபோட்டியில் நானும் பங்கெடுக்கிறேன் என்பதை விடவும், அவரின் முயற்சியையும், எனது மற்றொரு அன்பு சகோதரர் திரு. திண்டுக்கல் தனபாலன் அவர்களின் முயற்சியையும் ஊக்குவிக்கும் நோக்கத்தில் கவிதை என்ற பெயரில் சில வரிகளைத் தங்களுடன் பகிர்ந்து கொள்வதில் பெருமகிழ்ச்சி அடைகிறேன். அனைவருக்கும் எனது மனமார்ந்த இனிய தீபாவளி நல்வாழ்த்துக்கள்..

எச்சரிக்கை:
இதயம் பலவீனமாக உள்ளவர்கள், கர்ப்பிணிப் பெண்கள், குழந்தைகள் இவ்வரிகளைப் படிப்பதைத் தவிர்த்து விடுங்கள். மீறி படித்து தங்களுக்கு ஏதாவது ஆனால் நிர்வாகம் பொறுப்பேற்காது..
              ---------------------------------------------------------------------------------------
         

        நாம் சிரிக்கும் நாளே திருநாள்

ஒரு நரகாசுரனை வென்றதற்கு 

ஒவ்வொரு வருடமும் தீபாவளி

என்றால் அந்த எண்ணமே

என்னருகே வேண்டாம் என்பேன்..

வெடிப்பொருட்கள் தயாரிக்கும் நம்சொந்தங்களின்

வேதனைகள் மாறுகின்ற- எம்முயிர்க்கும்

பாதுகாப்பு இருக்கிறதெனும் மத்தாப்பு 

சிரிப்பு மலரும் நன்னாளே..

நம் உடன்பிறவா சகோதரிகள்

காமுகன்களின் பார்வையின்றி கடைவீதி 

கடந்து செல்லும் நற்காலம் 

பிறந்திடும் நன்னாளே..

பாசமில்லா பிள்ளைகளால் 

காப்பகங்கள் காணும் பெற்றோர்களே

இல்லையெனும் புள்ளிவிவரம்

வந்து விழும் அந்நாளே..

சகுனம் பார்த்து சடங்கு

செய்யும் சங்கடங்கள் காணாத 

சாத்திரங்கள் தோன்றுகின்ற சமுதாயம்

வந்து விடும் அந்நாளே..

நம் தொப்புள்கொடி இனத்திற்கு

புதுவிடியல் உதயமாகும் அந்நாளே

நாம் சிரித்திடும் நன்னாள்

நமக்கெல்லாம் திருநாள்..

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!