வெளுத்தது காங்கிரஸின் முகம்

முன்னாள் பிரதமர் ராஜிவ் கொலை வழக்கில் கைது செய்யப்பட்ட முருகன், சாந்தன், பேரறிவாளன், நளினி ஆகியோருக்கு தூக்கு தண்டனை விதிக்கப்பட்டது. இதனை சுப்ரீம் கோர்ட்டும் உறுதி செய்தது. பின்னர் நளினிக்கு விதிக்கப்பட்ட தூக்கு தண்டனை ஆயுள் தண்டனையாக குறைக்கப்பட்டது. இதனைதொடர்ந்து, கடந்த 2000ம் ஆண்டில், முருகன், சாந்தன், பேரறிவாளன் ஆகிய மூன்று பேரும் ஜனாதிபதிக்கு கருணை மனு தாக்கல் செய்தனர்.

இவர்களின் மனுக்கள் 11 ஆண்டு தாமதத்திற்கு பின், 2011ல் கருணை மனுக்களை அப்போது ஜனாதிபதியாக இருந்த பிரதீபா பாட்டீல் நிராகரித்தார். கருணை மனுக்கள் தாமதமாக பரிசீலிக்கப்பட்டதால், தங்களுக்கு விதிக்கப்பட்ட தூக்கு தண்டனையை, குறைக்க கோரி, மூன்று பேரும் சென்னை ஐகோர்ட்டில் நடந்த வழக்கு சுப்ரீம் கோர்ட்டிற்கு மாற்றப்பட்டது. இந்த வழக்கை விசாரித்த சுப்ரீம் கோர்ட் தலைமை நீதிபதி பி.சதாசிவம் தலைமையிலான பெஞ்ச், தூக்கு தண்டனையை ஆயுள் தண்டனையாக மாற்றி உத்தரவிட்டது. ஆயுள் தண்டனைக்கான வருடங்களுக்கு மேலாக சிறை தண்டனையாக பெற்றுள்ளதால் அவர்களை விடுதலை செய்வது மாநில அரசின் விருப்பதிற்கு விடுகிறோம் என்று கூறியுள்ளது.

அதன் அடிப்படையில் தான் தமிழக அரசு தமிழக அமைச்சரவை கூட்டம் முதல்வர் ஜெயலலிதா தலைமையில் இன்று அவசாரமாக கூடியது. இதன் பின்னர் 110 விதியின் கீழ் பேசிய ஜெயலலிதா, ராஜிவ் கொலை குற்றவாளிகளான முருகன், சாந்தன், பேரறிவாளன் ஆகிய 3 பேரும் சிறையில் இருந்த விடுதலை செய்யப்படுவர்; வேலூர் சிறையில் இருக்கும் முருகனின் மனைவி நளினி, ஜெயகுமார், ரவிச்சந்திரன் மற்றும் ராபர்ட் பயஸ் ஆகியோரும் விடுதலை செய்யப்படுவர்; இவர்கள் 7 பேரும் 23 ஆண்டுகள் சிறையில் இருந்ததை கருத்தில் கொண்டு இவர்கள் விடுதலை செய்யப்பட உள்ளனர். கருணை மற்றும் மனிதாபிமான அடிப்படையில் இவர்கள் விடுதலை செய்யப்பட உள்ளனர். இது தொடர்பான பரிந்துரை மத்திய அரசிற்கு அனுப்பி வைக்கப்படும்; தமிழக அரசின் பரிந்துரை மீது 3 நாட்களுக்குள் மத்திய அரசு முடிவு செய்யவிட்டால், அரசியலைப்பு சட்டப் பிரிவின் கீழ் மாநில அரசிற்கு அளிக்கப்பட்டுள்ள அதிகாரத்தின்படி தமிழக அரசே இவர்கள் 7 பேரையும் விடுதலை செய்யும் என்று கூறியுள்ளார்.

இந்த நிகழ்வுக்கு காங்கிரஸ் பொதுச்செயலாளர் ராகுல்காந்தி அவர்கள் மரணதண்டனைக்கு நான் எதிரானவன் ஆனால் உச்சநீதி மன்றத் தீர்ப்பு கவலையளிக்கிறது என்று கூறியுள்ளார். இது பொதுமக்கள் பலரையும் குழப்பி உள்ளது. மரணதண்டனைக்கு எதிரானவன் என்றவர் மரணதண்டனையை ஆயுள் தண்டனையாக குறைத்த உச்சநீதி மன்றத்தீர்ப்பு வருத்தமளிப்பதாக அடுத்த வரியில் கூறியுள்ளார் (லாஜிக் கே இடிக்கிறதே!)

தங்களின் சகோதரி பிரியங்கா காந்தி வேலூர் சிறைக்கு வந்து நளினியைச் சந்தித்து கண்ணீர் கலங்கியது எல்லாம் எதற்காக எல்லாம் கண் துடைப்பு நாடகமோ என்று நாட்டு மக்கள் பேசுகிறார்கள். உங்கள் கட்சியால் தேர்ந்தெடுக்கப்பட்ட குடியரசு தலைவர் திருமதி. பிரதீபா பாட்டில் கருணை மனுவை நிராகரித்த சூட்சமமும் வெளிச்சத்திற்கு வந்துள்ளது.

தமிழக அரசின் முடிவு குறித்து கருத்து தெரிவித்துள்ள மத்திய அமைச்சர் கபில்சிபல். ' தமிழக அரசின் கடிதம் கிடைத்தவுடன் அது குறித்து முடிவெடுக்கப்படும். நாட்டில் யார் பயங்கரவாதிகளுக்கு ஆதரவாக இருக்கிறார்கள், எதிராக இருக்கிறார்கள் என்பது தெளிவாகி உள்ளது. நான் எந்த ஒரு அரசையோ, கட்சியையோ கூறவில்லை,' என்றார். (அப்படியென்றால் இந்த வழக்கிற்கு தீர்ப்பு வழங்கிய உச்சநீதி மன்றத்தை அப்படி கூறுகிறாரோ என்ற ஐயம் மக்களுக்கு ஏற்படுகிறது மனிதவளத்துறை அமைச்சரே!)

சிதம்பரம் எதிர்ப்பு: தமிழக அரசின் முடிவு குறித்து கருத்து தெரிவித்த மத்திய நிதியமைச்சர் சிதம்பரம், மூன்று பேரின் தூக்கு தண்டனையை ரத்து செய்து சுப்ரீம் கோர்ட் தெரிவித்த கருத்து எங்களுக்கு மகிழ்ச்சியையும் அளிக்கவில்லை. வருத்தமும் அளிக்கவில்லை.
( நீதி வழங்கிய உச்சமன்றத்தை நிதி அமைச்சர் மதித்து நடப்பதில்லை எனும் குற்றச்சாட்டு பரவலாக காற்றோடு கலந்து வருகிறதே அதற்கான பதில் சிதம்பர ரகசியம் தானோ!)

விடுதலை முடிவு என்பது அரசியல் நோக்கமாக கூட இருந்து விட்டு போகட்டும் காங்கிரஸின் இந்த எதிர்ப்பு குரல் எண்ணற்ற இலங்கை தமிழர்களைக் கொன்று குவிக்க சத்தமில்லாமல் சைகைக் காட்டி விட்டதை நினைவுபடுத்துகிறது. இந்த ஒரு காரணத்திற்காகத்  தான் நாளும் இலங்கை ராணுவத்திடம் அடி வாங்கும் தமிழக மீனவர்களின் நிலையை பாராமுகமாக இருப்பதோடு மட்டுமின்றி தமிழக கட்சிகள் கூவியும் செவிசாய்க்க மறுப்பதன் மர்மமும் இன்று விளங்கிக்கொண்டது. வாழ்க உங்கள் பழிவாங்கும் படலம்.

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!