திண்டுக்கல் லியோனி அவர்களும் நானும் ஒரே மேடையில்

வணக்கம் வலை உறவுகளே!
நீண்ட நாட்கள் அரும்புகள் மலரவில்லை. அடுத்தடுத்த வேலைப்பளுவே காரணம். இப்போது மீண்டும் அரும்புகள் மலர ஆரம்பித்து விட்டது. மலரும் அரும்புகள் உங்கள் மனம் கவரும் மணம் வீசும் நம்பிக்கை இருக்கிறது. என் நலம் விசாரித்த நண்பர்கள் அனைவருக்கும் எனது இனிய அன்பான நன்றிகள்.

29.04.2013 அன்று கவிஞர் முத்துநிலவன் ஐயா அவர்களோடு நான் அலைபேசியில் பேசும் போது நிலவன் ஐயா இன்று மணப்பாறைக்கு வருகிறேன். மணப்பாறை அருகில் லியோனி அவர்களின் தலைமையில் பட்டிமன்றம் என்று சொன்னார்கள். உடனே அப்படியென்றால் வீட்டிற்கு வர வேண்டும் உங்களோடு நானும் பட்டிமன்றத்திற்கு வருகிறேன் என்று சொன்னேன் ஐயாவும் வருகிறேன் பாண்டியன் என்று இசைவு தந்தார்கள். அன்று இரவு 9 மணிக்கு மணப்பாறைக்கு ஐயா வந்து இறங்கினார்கள் நேரம் கருதி வீட்டிற்கு இன்னொரு நாள் வருகிறேன் நேராக பட்டிமன்றம் நடக்கும் இடத்திற்கு செல்வோம் என்று ஐயா கூறவும் இருசக்கர வாகனத்தில் இருவரும் கிளம்பினோம்.

சிறிது தொலைவு கடந்ததும் ஐயாவிடம் பட்டிமன்ற தலைப்பு என்னாங்க என்று கேட்டேன் அதற்கு ஐயா தெரியாது பதிலளித்தார்கள். நான் சற்று அதிர்ந்து இன்னும் கொஞ்ச நேரத்தில் நீங்கள் பேச வேண்டுமே ஐயா தலைப்பு தெரியவில்லை என்கிறீர்களே வியப்பாக இருக்கிறது என்று நான் வினவிய போது ஐயா அவர்கள் நான் எப்பவும் தலைப்பு கேட்பதில்லை அங்கு சென்று என்ன தலைப்பு சொல்கிறார்களோ அதற்கேற்ப என்னை தயார் செய்து கொள்வேன் என்று ஐயா சொன்ன போது மேலும் வியப்பாக இருந்தது. பட்டிமன்றம் என்றால் ஏற்கனவே பேசி வைத்துக் கொண்டு மேடையில் பேசுவார்கள் என்ற எல்லோருக்கும் இருப்பது போல் எனக்கும் இருந்த பொதுபுத்தி அப்போதே உடைந்து போனது.

எங்களுக்கு முன்பே வந்து காத்திருந்த திரு. திண்டுக்கல் லியோனி ஐயாவை ஓர் உணவகத்தில் சந்தித்தோம். லியோனி ஐயா அவர்களோடு அவரது மனைவி திருமதி அமுதா அவர்களும், பேச்சாளர்கள் திரு. மதுக்கூர் இராமலிங்கம் ஐயா, திரு. கோவை தனபாலன் ஐயா, திரு. கும்பகோணம் கண்ணன் ராவ் அவர்களும் இருந்தார்கள். அனைவரும் இரவு உணவு உண்டோம். அவர்கள் அனைவரும் இனிமையாக பேசி பழகியது மிகவும் மகிழ்ச்சியாகவும், நெகிழ்ச்சியாகவும் இருந்தது. பட்டிமன்ற மேடைக்கு சென்றோம். தலைப்பு கவிஞர் முத்துநிலவன் ஐயா அறிந்து கொண்டார்கள்.

அந்த தலைப்பு : அதிகம் சந்தோசமாக இருப்பது திருமணத்திற்கு முன்பா? திருமணத்திற்கு பின்பா?

ஜுலையில் திருமணமாக போகும் எனக்காக வைத்த தலைப்பு போலவே உணர்ந்தேன். என்னையும் அவர்களோடு மேடையேற்றி உட்கார வைத்து விட்டார்கள் சற்று தயங்கியே அவர்களோடு அமர்ந்தேன்.

அதிகம் சந்தோசமாக இருப்பது திருமணத்திற்கு பின்பே எனும் அணியில் கவிஞர் திரு. முத்துநிலவன் ஐயா அவர்களும், பேச்சாளர் திரு. கண்ணன் ராவ் அவர்களும் பேசினார்கள்.

அதிகம் சந்தோசமாக இருப்பது திருமணத்திற்கு முன்பு தான் எனும் அணியில் பேச்சாளரும் இலக்கியவாதியுமான திரு. மதுக்கூர் ராமலிங்கம் ஐயா அவர்களும், பேச்சாளர் திரு. கோவை தனபாலன் ஐயா அவர்களும் பேசினார்கள்.

(அவர்கள் பேசியவற்றை இங்கு கூறினால் பதிவு நீளும் உங்கள் பொறுமையைச் சோதிக்கும் என்பதால் நிக்ழ்வை மட்டும் பதிவிடுகிறேன் நண்பர்கள் மன்னிக்கவும்)இதுவரை அனைவரின் பேச்சையும் தொலைக்காட்சியில் கேட்ட எனக்கு அவர்களின் மத்தியில் அமர்ந்து கேட்டது புதிய அனுபவத்தையும் பேச்சுக்கலையில் தேர்ந்தவர்களின் சு(வாசம்) நமக்கு ஒட்டிக்கொள்ளட்டமே என்ற மகிழ்ச்சியும் தலைதூக்கி நின்றது. பல கூட்டங்களில் கவிஞர் திரு.முத்துநிலவன் ஐயா அவர்களின் பேச்சை நான் கேட்டிருக்கிறேன். முதல் முறையாக பொதுமேடையில் அவர்களின் பேச்சைக் கேட்கும் வாய்ப்பு மிகவும் சிறப்பானது.

திரு. லியோனி ஐயா அவர்களோடு கவிஞர் திரு. முத்துநிலவன் ஐயாவின் நட்பும், எந்த பட்டிமன்றமானலும் முதலில் பேச ஐயாவைத் தான் அழைப்பார் எனும் செய்தியும், பேச்சாளர்களை மிகவும் சுதந்திரமாக பேச அனுமதிக்கும் லியோனி ஐயா அவர்களின் பண்பும், பேச்சாளர்கள் என்ன பேசினாலும் சமாளித்து நகைச்சுவையில் கலக்கி நிகழ்ச்சியின் தலைவர் நான் தான் என்பதை நிமிடத்திற்கு ஒருமுறை நிருபிக்கும் அவரது சமயோசித புத்தியும் என்னை மிகவும் கவர்ந்தன. இப்படி புகழ் பெற்ற பேச்சாளர்களிடம் என்னை அறிமுகப்படுத்தி ஒரே மேடையில் நான் அமரவும் காரணமாக இருந்த திரு.கவிஞர் முத்துநிலவன் ஐயா அவர்களுக்கு தான் நான் நன்றி சொல்ல வேண்டும். இந்த பதிவின் மூலம் எனது நன்றிகள் ஐயாவிடம் சென்றடையட்டும். அனைவருக்கும் நன்றி. சந்திப்போம்.

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!