சினிமா விமர்சனம் அல்ல- சினிமா சார்ந்த விமர்சனம்

நண்பர்களுக்கு வணக்கம்.சினிமா விமர்சனம் அல்ல- சினிமா சார்ந்த விமர்சனம் கட்டுரை வடிவில் தந்துள்ளேன். சினிமாவால் எவ்வளவோ நன்மைகள் ஏற்பட்டிருக்கலாம் மறுக்கவில்லை. ஆனால் சமீபத்திய பாதிப்புகளால் இந்த கருத்துகளைக் கூறுகிறேன். தவறுகளோ, மாற்றுக்கருத்து இருப்பின் தாராளமாய் பின்னூட்டத்தில் தாருங்கள்.

முன்னுரை
இன்றைய சினிமா உலகம் எங்கே சென்று கொண்டிருக்கிறது. மக்களுக்கு என்ன விடயத்தைக் கற்று கொடுக்கிறது என்பது தான் மிகப்பெரிய வேதனையாக உள்ளது.
நல்ல படங்கள் அவ்வப்போது வந்தாலும் பெரும்பான்மை குடும்பத்துடன் சென்று பார்க்க முடியாத ஆபாச இரட்டை வசனங்கள், வன்முறை காட்சிகள், மது மற்றும் புகை பிடிக்கும் காட்சிகள் நிறைந்த படங்களே அதிகம் வருகிறது.

கதாநாயகர்களுக்கு
ரசிகன் ஒருவன் நம்பி தமது வேர்வையால் உழைத்த காசில் டிக்கெட் எடுத்து திரையரங்குக்கு செல்கிறான். முடிவில் அவனுக்கு ஏமாற்றமே மிஞ்சுகிறது. நல்ல படங்களைத் தந்த கதாநாயகர்களே ரசிகர்களின் நாடி பிடித்து நடிப்பதில் தற்போது தவறி வருவதைக் காண முடிகிறது.

பொழுதுபோக்கு அம்சங்கள் ஒரு திரைப்படத்தில் இல்லாமல் போனாலும் பரவாயில்லை, கதையே இல்லாமல் பல படங்கள் இன்றைக்கு வருகிறது. தனது ரசிகர்களுக்கு என்ன கற்பிக்க இந்த படத்தில் நடக்கிறோம் என்பதை எந்த கதாநாயகர்களும் சிந்திப்பதாகத் தெரியவில்லை.
சற்றும் தயங்காமல் வன்முறை, டூயட் என்ற பெயரில் நடிகைகளுடன் நெருக்கம் என்பதெல்லாம் தேவை தானா கதாநாயகர்களே!

ஒரு சில கதாநாயகர்கள் தவிர ,மற்றவர்கள் தனது ரசிகர்களைக் கட்டுப்படுத்த தவறி விடுகின்றனர். தனது நிலை தெரியாமல் தனக்கு என்னமோ உலகம் முழுவதும் ரசிகர்கள் இருப்பதாக எண்ணிக்கொண்டு கற்பனையில் மிதக்கும் பவர்ஸ்டார் போன்ற நடிகர்களை என்னவென்று சொல்வது!

பொங்கலுக்கு வெளிவந்த இரண்டு படங்களையும் பார்த்து விட்டேன். இரு படங்களைப் பற்றி பேச வேண்டியதில்லை. ரசிகர்கள் பற்றி தான் பேச வேண்டும் தனது கதாநாயகர், கதாநாயகி திரையில் தோன்றினால் நாற்காலியின் மேல் ஏறிக்கொண்டு போதையில் ஒரே சப்தம். புகைப் பிடிப்பதால் வரும் நாற்றம் இவைகளுக்கிடையே படம் பார்த்து நல்ல படியாக வெளியில் வந்தாலே சாதனை தான். இளைஞர்களின் சக்திகள் இப்படி வீணாவது சரிதானா! அவற்றை நல்வழியில் பயன்படுத்தும் பொறுப்பு இருப்பதைக் கதாநாயகர்கள்  உணரவில்லையா!

கதாநாயகிகளுக்கு
கதாநாயகிகள் தாராளமயமாதல் என்பதைத் தவறாக புரிந்து கொண்டார்கள் போல. இரண்டு அல்லது மூன்று வயது குழந்தைக்கு அணியக்கூடிய ஆடையைத் தான் உடுத்தி வருகிறார்கள். மூன்று வயது பெண் குழந்தைக்கு அந்த ஆடையை உடுத்தி விட்டாலே பெண் குழந்தைக்கு இந்த ஆடை தேவை தானா என கிராங்களிலுள்ள பாட்டிகள் கோபித்து கொள்வார்கள். அது போன்ற ஆடைகளை உடுத்தும் நிர்பந்தம் நடிகைகளுக்கு ஏற்பட்டு விட்டதோ! போட்டியின் காரணமாகவும் பட வாய்ப்புகள் கைநழுவிப் போக கூடாது என்பதற்காகவும் துணிச்சலாக கவர்ச்சியாக நடிக்க ஒத்துக்கொள்கிறார்கள் என்பதே உண்மையாக இருக்கலாம். இருப்பினும் இந்நிலை மாற வேண்டும் ஒட்டுமொத்த நடிகைகளின் மனநிலை மாற்றம் வேண்டும்.

ரசிகர்களுக்கு
\அதற்கு முன்பு ரசிகர்களின் மனநிலையில் மிகப் பெரிய மாற்றம் வேண்டும் திரைப்படங்களை பொழுதுபோக்கு அம்சமாக பார்க்க வேண்டும். தனது தலைவனுக்காக மற்ற நடிகர்களைத் தரக்குறைவாக சித்தரித்து பதாகைகள் வைப்பது, நடிகைகளை வெறும் கவர்ச்சிப்  பொருளாக மட்டும் பார்ப்பது போன்ற அம்சங்கள் களையப்பட வேண்டும். நல்ல படங்களை மட்டுமே பார்ப்போம் எனும் உறுதிமொழியை எடுத்துக்கொள்ள வேண்டும் ஏனெனில் எவ்வளவோ நல்ல படங்களை எடுத்தவர்கள் நட்டமடையும் நிலையை உருவாக்கியவர்களும் நாம் தான்.

இயக்குநர்களுக்கு
சமுதாயத்தில் அங்கொன்றும் இங்கொன்றும் நடக்கும் எதிர்மறை நிகழ்வுகளை மட்டுமே கதைக்கு மையமாக வைத்து படம் எடுப்பது சரியானதா! அதை அப்படியே பின்பற்றும் ரசிகர்களால் தவறான நிகழ்வு ஏற்பட்டு கேள்வி எழும் போது சமுதாயத்தில் நடக்கும் விடயங்களைத் தான் படமாக எடுக்கிறோம் எனும் ஒற்றை வரி பதிலில் விலகிக்கொள்வது நியாயம் தானா!’
கதை ஒரு கிராமத்தில் நடக்கும் போது பாடல் காட்சிக்கு மட்டும் வெளிநாடுகளுக்கு செல்வதன் நோக்கம் என்ன என்பதற்கு பல காரணம் நீங்கள் கூறினாலும் படிப்பவர்கள் உண்மை நிலையை உணர்வார்கள்.

முடிவுரை
ஒரு காலத்தில் கதாநாயகர்களைப் பார்த்து வளர்ந்த தமிழ்ச் சமுதாயம் அதே கதாநாயகர்களைப் பார்த்து தேய்ந்து வருவதைக் கவனிக்க வேண்டும். இல்லையேல் எதிர்கால சமுதாயம் தவறான படிப்பினையைத் திரைப்படங்கள் மூலம் கற்று சீரழிவை நோக்கி பயணிப்பதைத் தடுக்க முடியாது.

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!