உங்கள் வீட்டில் தனியாக இருந்தால் என்ன செய்வீர்கள்?

நண்பர்கள் அனைவருக்கும் வணக்கம்!
வலைப்பக்கம் தந்த நட்பு குடும்ப உறவாக மாறுவது சாத்தியமா! நிச்சயம் சாத்தியம் என்பது எனக்கு ஏற்பட்ட அனுபவம். திரு. கவிஞர் முத்துநிலவன் ஐயா, திரு.மது கஸ்தூரிரெங்கன், திருமதி மைதிலி கஸ்தூரிரெங்கன் இவர்களின் நட்பு வலைப்பக்கத்தில் அரும்பியது. ஆனால் இன்று குடும்பத்தில் ஒருவராக உலா வந்து கொண்டிருக்கிறார்கள் என்றால் இதை விட நான் சம்பாதிப்பதற்கு என்ன இருக்கிறது என்று கேட்கத் தோன்றுகிறது. இவர்கள் நேரடியாக கேட்டுக்கொண்டதற்கு இணங்கவும்,  இவர்களைப் போலவே என்னோடு நட்பு பாராட்டும் வலைப்பதிவர்கள் நிறைய. அவர்களும் என் மனதில் சகோதர்களாக, சகோதரிகளாக வலம் வந்து கொண்டிருக்கிறார்கள் இது என்றும் தொடரும்..   அவர்களுக்காவும், இன்னபிற மனதினுள் எதிர்பார்க்கும் நண்பர்களுக்காகவும் இந்த பதிவு.

1.உங்களுடைய 100 பிறந்தநாளை எப்படி கொண்டாட விரும்புகிறீர்கள்?எனது 101 ஆவது பிறந்த நாளை விட சிறப்பானதாக இருக்க வேண்டும்.

2.என்ன கற்றுக்கொள்ள விரும்புகிறீர்கள்?
கற்றுக் கொள்ள நிறைய இருக்கிறது. முக்கியமாக வாழ்க்கைப் பாடத்தை. அதை வாழ்ந்து சறுக்கி விழுந்து தான் கற்றுக் கொள்ள முடியும் என்பதாக உணர்கிறேன். இந்த கற்றலுக்காக எத்தனை முறை வேண்டுமானாலும் சறுக்கி விழ தயார்.

3.கடைசியாக சிரித்தது எப்போது? எதற்காக?இந்த நொடி. வாழ்க்கையின் எல்லா தருணங்களையும் நான் இந்த நொடியாக தான் பார்க்கிறேன். அடுத்த நொடி என்பது கூட அப்பொழுது அது இந்த நொடி தானே! அடுத்தவர்களின் வாழ்க்கையோடு விளையாடும், அடுத்தவர்களின் வாய்ப்புகளைத் தட்டிப் பறிக்கிற, சுயநலம் கொண்ட சில வேடிக்கை மனிதர்களை எண்ணி.

4. 24மணி நேரம் பவர்கட் ஆனால் நீங்கள் செய்வது என்ன?என்னை சுதந்திரமாக உலாவ விட்டதற்கு முதலில் நன்றிகள். பகலில் நண்பர்களோடு பேசி வருவேன். இரவில் நீல ஆடைக்குள் முகம் மறைத்து சற்றே எட்டிப் பார்க்கும் நிலவு பெண்ணுடனும், அவளோடு விளையாடும் நட்சத்திர தோழிகளுடனும் மனதை பழக விட்டு மகிழ்ந்து வருவேன். (இந்த பதில் மதுகஸ்தூரி சகோ அவர்களோடு ஒத்திருக்கிறது)

5. உங்கள் குழந்தைகளின் திருமண நாளில் அவர்களிடம் சொல்ல விரும்புவது என்ன?
சுக துக்கங்களில் இருவரும் கரம் பிடித்து கடைசி வரை நடைபோட வேண்டும். இதில் யார் உயர்ந்தவர் என்றே பேச்சுக்கே இடமில்லை. இருவர் உள்ளமும் இரண்டென கலந்து விட்டால் அங்கே ஆள்வது அவர்களின் அன்பாகத் தான் இருக்க முடியும். அன்பால் ஆட்சி செய்யுங்கள் வாழ்க்கை உங்கள் வசம் என்று வாழ்த்தும் அளவிற்கு எனக்கு வயதில்லை. எனக்கு நானே சொல்லிக் கொள்கிறேன்.

6.உலகத்தில் உள்ள பிரச்சனையில் உங்களால் தீர்க்கமுடியும் என்றால் எந்த பிரச்சனையை தீர்க்க விரும்புகிறீர்கள்?
ஒவ்வொருவரும் தனக்குள்ளே எட்டிப்பார்க்கும் வன்மத்தைக் கட்டுப்படுத்தப்பட வேண்டும் அல்லது கலையப்பட வேண்டும். அப்படி மட்டும் நடந்து விட்டால் உலகப் பிரச்சனைகள் எல்லாம் தானே சரியாகி விடும்.

சிலையும் நீயே
சிற்பியும் நீயே உன்னை நீ சரி செய்து கொள்
உலகம் தானாக சரியாகி விடும்

எனும் வாசகமே என்றும் மனதில்..

7.நீங்கள் யாரிடம் அட்வைஸ் கேட்பீர்கள்?
பெரும்பாலும் நண்பர்களிடம். அவர்கள் என்ன தான் சொன்னாலும் எனக்குள் இருக்கிறவன் (மனது) அனுமதி தந்தால் செயலாக்குவேன்.

8.உங்களை பற்றிய தவறான தகவல் பரப்பினால் என்ன செய்வீர்கள்?
அவர்களின் மனதில் மண்டிக்கிடந்த தவறான எண்ணம்  வெளி வர நான் கருவியாக இருந்திருப்பதை எண்ணி மகிழ்ச்சிக் கொள்வேன்.

9.உங்கள் நண்பரின் மனைவி இறந்தால் அவரிடம் என்ன சொல்வீர்கள்?
இழப்பு என்பது எவராலும் ஈடு செய்ய இயலாது தான். இருப்பினும் அவளின் எண்ணங்கள், கனவுகள் எல்லாவற்றையும் நீ நிறைவேற்றவாய் என்ற நம்பிக்கையில் அவளின் கடைசி மூச்சு நின்றிருக்கிறது. ஆதலால் நீ மெல்ல எழு.. அவளின் எண்ணங்களுக்கு உயிர் கொடு... உன் கரம் பற்ற, தோள் கொடுக்க நான் இருக்கிறேன் என்பேன்..

10.உங்கள் வீட்டில் தனியாக இருந்தால் என்ன செய்வீர்கள்?
இதோ இப்ப பண்ணிட்டு இருக்கேன்ல. வலைப்பக்கங்கள் படிப்பது, புத்தகம் படிப்பது, தொலைக்காட்சியில் கிரிகெட் ஒன்று தான். எதிர்கால திட்டமிடல் என்று பெரிதாக இல்லாவிட்டாலும் அது பற்றிய சிந்தனைகள் மறுப்பதற்கில்லை.

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!