அரசு பள்ளியில் பட்டிமன்றம் - புதிய அனுபவம்

நண்பர்களுக்கு வணக்கம்

புதுக்கோட்டை மாவட்டம் மலம்பட்டி ஊராட்சி ஒன்றிய நடுநிலைப்பள்ளியில் ஆங்கில ஆசிரியராக பணிபுரியும் திரு.சுரேஷ் அவர்களை வழக்கம் போல் சந்திக்கையில் எங்கள் பள்ளியில் ஆசிரியர்கள் பங்குபெறும் பொங்கல் சிறப்பு பட்டிமன்றம் நடத்த உள்ளோம் அதில் நீங்கள் நடுவராக வர வேண்டுமென்று கூறினார் அதைக் கேட்டதும் அதிர்ச்சியோடு முதலில் மறுத்தேன். பின்னர் அவரது அன்பும், அவரது மனைவி திருமதி. ஜான்சிகிளாரா (எங்கள் பள்ளியில் உடற்கல்வி ஆசிரியர்) அவர்களின் அன்பும் என்னை ஏற்றுக்கொள்ளச் செய்தது.


பட்டிமன்றத்தின் தலைப்பு

”குழந்தைகளின் நலனில் மிகுந்த அக்கறை செலுத்துவதில் தாய்களா! தந்தையா!”

10.01.2014 அன்று காலை 10 மணிக்கு  புனித சவேரியார் ஆலய வளாகத்தில் பள்ளி தலைமையாசிரியர் திருமதி. இரா. பொட்டுமணி அவர்கள் முன்னிலையில் பங்குத்தந்தை திரு. பால்ராஜ் அவர்கள் தலைமை தாங்க ஆசிரியர்களோடு ஒரு மாணவியும் பங்கு பெற்ற பட்டிமன்றம் துவங்கியது.

தாய்களே எனும் அணியில்                 தந்தைகளே எனும் அணியில்

1. திருமதி ப. மாரிக்கண்ணு                1.திருமதி. பே.இரா. மேரிபியூலா
2. திரு. அருள்ஜோசப்ராஜ்                   2.திரு.இரா.சுரேஷ் 
3.திரு.அ.அருள்தாஸ்                          3.திரு.அ.குணசேகரபாண்டியன்
4. செல்வி.செ.ஜெனிபர்                       4.செல்வி. சாந்தி (மாணவி)

ஆகியோர்கள் தங்களது சிறப்பான வாதத்தை எடுத்து வைத்தார்கள். இரு புறமும் சொற்போர் கருத்தாழம் மிகுந்து நடைபெற்றது.  திரைப்பட பாடல்களையும் தமிழ், ஆங்கில இலக்கியங்களிலிருந்து மேற்கோள்கள் காட்டியும் பேசி அசத்தினர். இடையிடைய என்னிடமும் கேள்விக் கணைகளைத் தொடுத்து திக்குமுக்காட செய்தார்கள். குறிப்பாக மாணவி சாந்தி ஆசிரியர்களுக்கு இணை கொடுத்து இயல்பாக பேசியது வியக்க வைத்தது.

பட்டிமன்றத்தின் முடிவு இரு அணியின் இரண்டரை மணிநேர வாதங்களைக் கேட்டு இறுதியாக குழந்தைகளின் வளர்ப்பை இன்றைய சூழ்நிலையில் பெண்களிடம் விட்டுவிட்ட ஆண்களைக் கோடிட்டுக் காட்டியும், இயற்கையாகவே ஒரு குழந்தை தடுக்கி விழும் போதும், தும்மும் போதும் அம்மா என்றே பெரும்பான்மையாக கூறுவது அவர்கள் மீது மிகுந்த அக்கறையைத் தாய்கள் காட்டுவதால் தான் போன்ற நிகழ்வுகளைக் கூறி

குழந்தைகளின் நலனில் மிகுந்த அக்கறை செலுத்துவது தாய்களே!                                    எனும் தீர்ப்பை வழங்கினேன். 

பட்டிமன்றம் இனிதே நடக்க இட உதவியும்  ஒலிப்பெருக்கி சாதனங்களையும் அளித்த மலம்பட்டி புனித சவேரியார் ஆலயத்தின் பங்குத்தந்தை திரு. பால்ராஜ் அவர்களுக்கும்,  உறுதுணையாக இருந்த பள்ளியின் ஓவிய ஆசிரியர் திரு. ராஜா, பெற்றோர் ஆசிரியர் கழகத்தலைவர் திரு. சுப்பிரமணியன், துணைத்தலைவர் திரு. சவரிமுத்து, கிராமக்கல்வி குழு தலைவர் திரு. சேகர்,  அரசு உயர்நிலைப்பள்ளியாக்குவதற்கு தேர்ந்தெடுக்கப்பட்டக் கல்விக்குழுத் தலைவர் திரு. சவரிநாதன், மாணவர்கள் உள்ளிட்ட எங்களுக்கும் மிக சுவையான பொங்கல் வழங்கிய சத்துணவு அமைப்பாளர் செபாஸ்டின், சத்துணவு ஊழியர்கள், எங்களது உரையை அமைதியாக கேட்டு ரசித்த  இடங்களில் கைதட்டி ஆரவாரம் செய்த நிகழ்வின் உண்மை நடுவர்களாகிய மாணவர்கள் ஆகிய அனைவருக்கும் எமது உளமார்ந்த நன்றிகள்.

பட்டிமன்றத்தின் நடைமுறைகளையும், ஆலோசனையும் வழங்கிய பட்டிமன்ற பேச்சாளர் திரு.முத்துநிலவன் ஐயா உள்ளிட்ட எனது நண்பர்கள் அனைவருக்கும் தனிப்பட்ட அன்பார்ந்த நன்றிகள்.

 மற்ற பள்ளிகளுக்கு முன்னுதாரணமாக அமைந்த இப்பட்டிமன்றம் எனக்கு மிகுந்த மகிழ்ச்சியையும் மனநிறைவையும் தந்தது.

நண்பர்களுக்கு அனைவருக்கும் தங்கள் இல்லத்தார் அனைவருக்கும் எனது உளமார்ந்த பொங்கல் நல்வாழ்த்துகள். அனைவரும் வாழ்விலும் மகிழ்ச்சி பொங்கட்டும். நன்றி..

கீழுள்ள திரட்டிகளில் ஓட்டளித்தும், சமூக தளங்களில் பகிர்ந்து கொள்ளுங்கள்... நன்றி...!